بوابة الوقائع لكل خبر حكاية
مقالات مشابهة
كتب عصام عبدالعزيز الحوت
عقد الكاتب الصحفي ضياء رشوان وزير الدولة للإعلام لقاء موسعًا مع نخبة من أبرز المؤثرين وصنّاع المحتوى الرقمي في مصر ضمت نحو (70) من المتخصصين منهم في المحتوي الجاد بأنواعه: السياسي والاقتصادي والاجتماعي والثقافي والعلمي والتكنولوجي، حيث يبلغ إجمالي عدد المتابعين الدائمين لمجموعة المؤثرين الذين حضروا اللقاء على وسائل التواصل الاجتماعي أكثر من (500) مليون متابع.
وهاجم عدد من المتابعين الاجتماع متهمين وزير الدولة للإعلام بمنحه المؤثيرين وصناع المحتوى موافقة ضمنية ورسمية على انتشار تأثير وسائل التواصل الاجتماعي ومن يعملون بها كمؤثرين وصناع محتوى
في المقابل دافع الكثير من المتابعين عن الاجتماع مؤكدين أهمية دور صانع المحتوى في الإعلام الموازي والشعبي.
من جانبه كتب صانع المحتوى محمد أبو عاصي وأحد الحاضرين في الاجتماع دافع فيها عن نفسه وزملائه مؤكدا أنهم ليسوا (عواطلية).. خلينا نقول الحقيقة.. بلاش تجميل.. «العواطلية».. بين قوسين صُناع المحتوى
انتقد وهاجم الوسط الصحفي والإعلامي، وحتى عدد من الناس، من امبارح، اجتماع وزير الدولة للإعلام، والزميل الصحفي الدكتور ضياء رشوان، بمؤثرين السوشيال ميديا، اللي أطلق عليهم بعض زمايلنا في الوسط الصحفي صفة «العيال العواطلية» أو «اللي مالهمش شغلانة». بتهاجموا إيه بس.. أومال لما تعرفوا اللي هيحصل؟!
وللعلم، دي صفة بعض الناس بتتداولها في مصر عمومًا، ويمكن دي وجهة نظر بعض الناس في مصر عن «صانع المحتوى»، اللي أنتم بتسموهم «بلوجر ويوتيوبر وتيكتوكر».
أنا كنت حاضر اجتماع وزير الدولة للإعلام، وتم التنسيق معايا قبله بحوالي أسبوع إني أكون موجود، واطلعت على كل الأسماء، وكنت مضايق جدًا لما صحيفة زميلة، بأعتز بيها، كتبت خبر عن الحضور، وكان الخبر فيه معلومات غلط، وأنا معايا المعلومة والأسماء من قبلها بأيام.. وسائني إن الصحيفة الزميلة قصّرت، ممكن في التدقيق في المعلومة أو في جزء منها، لأنها مش كلها كانت غلط، لكن برضه جهد يُشكر، في وقت بعض الصحفيين قاعدين فيه مستنيين بيان صحفي يوصلهم.. «شغل بصطجية».
85% من صناع المحتوى في الاجتماع صحفيين وإعلاميين
وبصراحة، تشرفت جدًا بوجودي ضمن «العواطلية»، رغم إني حاضر في اجتماع المؤثرين بـ3 مناظر: صحفي + مذيع + صانع محتوى.
لأ، وتأكدت بعد الاجتماع ده إن مستقبل الإعلام في مصر اتغير، وهيتغير أكتر الفترة الجاية، شاءت الدولة أم أبت وشاءت وسائل الإعلام التقليدي أم أبت.. أنا كنت قدام ناس امبارح قوية، بتنتزع دورها وبتحافظ عليه، عندها رسالة، وكل واحد فيهم مصمم يكمل مشواره بالشكل اللي بدأ بيه ويطوّر من نفسه، وإن ما يحصلش أي أمر طارئ في الطريق يخليه يفقد هويته أو مصداقيته.
%85 من الحاضرين امبارح، أصلًا يا إما حاصلين على درجات علمية من كليات الإعلام، أو عاملين بالصحافة وأعضاء رسميين في نقابة الصحفيين المصرية، يا إما مذيعين ومقدمين برامج.
والـ15% المتبقية بيدرسوا إعلام دلوقتي على حسابهم، وعشان يطوروا من أدواتهم، بين قوسين: كل دول الإعلام الخاص الجديد.. دول مش عواطلية حضرتك، دي ناس فاهمة.
دول مش عواطلية حضرتك، دي ناس بتقدم معلومة ووعي وفكر وترفيه منضبط وفن وتمثيل.
دول مش عواطلية حضرتك، دول الناس اللي اتهمّشوا في جرايدهم وقنواتهم التلفزيونية، لأنهم شطار.
دول مش عواطلية حضرتك، دول الناس اللي مالهمش واسطة، ولا بتخدمهم المحسوبية عشان يتصدروا المشهد ويطلعوا سلم الشللية.. سلم الشللية اللي خلى شكل الإعلام المصري مش ولابد، لدرجة إنك ممكن تتصدر مشهد إعلامي لمجرد إنك معرفة، أو واخد مكانك بالأقدمية، أو لأسباب تانية كتير.
لأ حضرتك، أنا أروح أعمل منصة وأشتغل وأطور، والقبول من عند ربنا، والناس لما بتقتنع بيك وباللي بتقدمه بتتابعك، وساعتها بتعلى من هنا، وتنجح، يعني الحكم الجمهور وده مبيرحمش.
فالحاضرين ما كانوش جزء من الشللية دي، دول راحوا اجتماع الدولة اللي طلبتهم بعد ما بقوا نجوم في مجالهم.
امبارح كان بيجلس على ترابيزة وزير الدولة للإعلام «600 مليون» مشترك ومتابع، أما المشاهدات فأعتقد أنها بالمليارات.. إحنا وكلاء لـ كل مصر تقريبًا وكنا ممثلين ليها تقريبًا.
دول مش عواطلية حضرتك، دول سفراء الـ600 مليون متابع، بين قوسين «فلورز».
العواطلية دول ليهم فكر ووعي لازم يُحترم، ومش كل واحد راح قعد مع الدولة يبقى في صدام مع الشارع، أو عمل صفقة على حساب الناس.
الوزير بيقول إن الدولة بتسمع من صناع المحتوى، ومنفتحة على تقديم دعم لهم، يقول الـ 100 صانع محتوى، فجأة يقاطعوا الوزير، ياسيااااادة الوزير لا دعم مااااااااااادي، خالص.. مش عايزين. الوزير قال الدعم هنا نقصد الدعم المعلوماتي، معلومة معينة، نحضر اجتماعات رئيس الحكومة.. قلناله ده اللي إحنا عايزينه.. وده موقف أنا سعدت بيه جدًااااااااا.. ودي أمانة كان لازم أنقلها
العواطلية دول هم اللي هدوا أسطورة الخبراء اللولبيين، اللي بيقولوا كلام «مجعلص» هم نفسهم مش فاهمينه، واللي بيذيعوا كلام مش صح ومش مضبوط، وبيزيفوا وعي الناس، وده بيحصل من سنين.. وهم واضحين قدامكم على الشاشة، وللأسف الإعلام بقى بيستضيفهم.. الخبير اللولبي اللي فاهم وقاري وعارف، وهو جزء كبير من كلامه غلط….
في الوقت اللي العواطلية، بيذاكروا ويقرأو ويطروا من نفسهم، وعشان على قد ما يقدر يتفادى الغلط، لأنه لو غلط هيتمسح بيه أرض مصر كلها.. الوقفة قدامكم صعبة جدًا
العواطلية دول ما رحبوش بالوزير امبارح وقضوها ضحك وهزار، دول كانوا صوت الشارع، وصوت الناس، ورسايل كتير من الشارع للحكومة..
ما طلبناش حاجة لنفسنا، أصل مش محتاجين الصراحة.. خلاص، أنت جيتني وأنا متدبس في معداتي، وأقل واحد فيهم معاه معدات تعدّي النص مليون جنيه على الأقل.
ورغم كده، مفيش مكسب خيالي ولا عائدات كبيرة حتى من ورا ده، بس هي طلقة وطلعت.
حضرتك، دول وقفوا ضد تداخلات 38 جهاز مخابرات على مستوى العالم، قدروا يوقعوا الدولة في 2011، واشتغلوا إشاعات وتوجيهات وغيره.
وبشهادتكم، إعلام الدولة كان ضعيف، والناس فاقدة فيه الثقة.
فمين اللي وقف؟ ومين اللي تطوع يقدم الصح وبالحياد؟ مش مجاملة للدولة، لأن لو جاملت، أنت كمتابع هتلفظني، وهتفقد الثقة فيّ برضه.
دول مش عواطلية حضرتك، دول مقدمي المحتوى السياسي والاقتصادي منهم، اتهاجموا بقوة، ولسه بيتهاجموا بقوة، وبيتم ترهيبهم اجتماعيًا بقالهم أكتر من 11 سنة، وبيتشتموا بأفظع الألفاظ، بتهمة إنهم خط دفاع عن الدولة ضد الهجمات اللي جاية من الخارج، من الإعلام «العميل».
تخيل شكل البلد من غيرهم كان هيبقى عامل إزاي؟ كنت هتكون مادة خام للثورات والانهيارات والشائعات، رغم إن الواقع بيأكد كلامهم.
دول مش عواطلية، دول الناس اللي آمنت بأهمية الوعي والمعلومة، ووقفوا ضد أجهزة دول وكيانات وشركات بتصرف مليارات الدولارات عشان تهد دولة زي مصر، وتزيف بالباطل وعي أهلها.
وبأدواتنا البسيطة، لكن كان عندنا حلم قوي جدًااااااا.. حلم مهني التقى مع الواجب الوطني، وبالحياد، من غير مجاملة للدولة.
بننتقد وبنأيد وبنعارض وبنهاجم، بس كله بواقع وأساس، والواقع واللي حواليك في دول المنطقة بيأكد الكلام ده.
أنت وقفت ضد الحملات الشرسة على دولة زي مصر، والحملات دي مش بس ضد مقدمي المحتوى السياسي والاقتصادي، ده كمان الفكري والتثقيفي والفني.
دول مش عواطلية، دي الناس اللي بتقدم معلومة ووعي وفكر وترفيه منضبط وفن وتمثيل.
دول مش عواطلية، دي ناس شاطرة جدًا، ملقتش الفرصة اللي على مقاسها، فاضطرت تصنعها.
أصل مالهمش واسطة ولا شللية، وكتير مننا عانى في مؤسساته من تضييق رؤسائه، وإنهم مش فاهمين ولا متعاونين ولا فاتحين الباب ليه عشان يطور ويعلى.
وبدل ما يحارب عشان يعلى ويغير الواقع، تلاقيه بيحارب عشان بس يفضل شغال أجير بيومية..
لأ حضرتك، السوشيال ميديا فتحت باب الفرصة، وادّت الجمهور حق الحكم، ودي سلطة الجمهور، اللي مش محتاجة واسطة، ولا هتنفع معاها الشللية.
دول مش عواطلية، دي ناس كل يوم بيجيلها تكريمات من دول مهمة في المنطقة، وكمان فيه استقطابات؛ فيه اللي بيقبل وفيه اللي بيرفض، والمعظم رفض.
أكيد الدول دي مش هتدفع ملايين في «صانع المحتوى المصري» جدعنة، أكيد عارفة أهمية دوره، يا إما في نشر الوعي عنده، يا إما في التسويق ليه، يا إما في إيصال رسائل سياسية وفكرية وثقافية معينة، يا إما في ضرب وتغييب الوعي عندك.. وركز مع دي أووووي.
دي ناس بتتكرم في دول باسم مصر، وكونك مش عارف بيتكرموا ليه، دي مشكلتك.
العواطلية دول بقوا شريحة ضريبية، وبيدفعوا ضرايب، وكلهم منضبطين وملتزمين في ده، وكمان عندهم شركات ومشغلين ناس بالمئات.. الموضوع مش تليفون و«رينج لايت».
صناع المحتوى المصري اقتحموا وفرضوا مصر بقوة إعلاميًا على كل دول الشرق الأوسط والعالم، في الوقت اللي المفروض إنها تنكسر وتختفي إعلاميًا.
إحنا أخبارنا اللي بننقلها بقت مصدر للصحافة الإسرائيلية، وبقينا نزاحم في السيطرة على الوعي الإسرائيلي، واقتحمنا المناخ عندهم بدل ما كنا مجرد رد فعل لإعلامهم..أصل إحنا لعبنا بقواعدهم.
مش مستنيين من الدولة لا توجيه ولا دعم، لأن زي ما قلت لك، كل واحد حط سياسة تحريرية ملخصها: الناس عايزة إيه؟ وصوت الناس إيه؟ والحق والحياد إيه؟!
وكلنا تعبنا وبنينا، ومضينا أقساط واشترينا معدات.
لكن مستنيين من الدولة اعتراف بأهمية الناس دي، ودعم الاتجاه ده، وكمان تقنينه..ما هو مش أي حد يبقى صانع محتوى.. لأ، ومش طالبين إن الدولة تعمل لينا مظلة قانونية أو نكون تحت تصرفها إطلاقًاااااااااااا.. دي نقابة مستقلة، تحدد مين هو صانع المحتوى، وإيه هو المحتوى.. نقابة مننا وفينا، زي نقابة الصحفيين وزي نقابة الإعلاميين.. نقابة تحمي حقوق الناس دي، وتبرز دورهم، وتنظم سوق ومجال صناعة المحتوى. أنا ماليش دعوة باللي «بيرقص» ولا «اللي بيقول كبسوا.. كبسوا».
أنا مش من محبي توزيع الإشادات، لأني بعتبر إن إشادتي غالية، ومش بتتمنح إلا للي يستحق. وبالتالي لازم أقول بكل صراحة إن اجتماع وزير الدولة للإعلام امبارح كان مع «مُـــــبـدعـــــين».. وناس فاهمة.. وإن صفة العواطلية بتنم عن عدم وعي واضح بطبيعة الدور اللي بيقوم بيه صناع المحتوى، وإن عندك خلط ومعلومات غير دقيقة عن صانع المحتوى.. فراجع نفسك.
وخلينا نتكلم بكل صراحة، من غير فلاتر أو تجميل. للزملاء الصحفيين، وللي بيشتغلوا في الإعلام، وأنا واحد منكم: السوشيال ميديا بقت الإعلام الجديد، وانضمت، بل وتفوقت على ثالوث الإعلام: «الصحافة + التلفزيون + الراديو».ودي جملة تزعلني كصحفي، بس لازم نواجه نفسنا كصحفيين بالحقيقة.
إحنا قاعدين ليل نهار في جرايدنا بنندب على ضعف المرتبات، وده حق لينا، وبندور إزاي ناخد أجازات، وده كسل مننا، وخايفين نطلع نذيع فيديوهات ونحسن دخل مؤسساتنا الصحفية، وده كسوف وإخفاق مننا.. ده حتى مش قادرين نجيب التصريح الخاص أو الكواليس، ولو 10% شغالين إنهم يجيبوا كواليس، فرئيس تحريرهم بيرفض نشرها.. ومش عشان يرجع للدولة أو يستنى بيان رسمي، لأ، ولا عشان مضايق منك.. ممكن عشان مش عايزك تظهر فتأخد مكانه.. وأنا اشتغلت في جرايد كتير، وحصل معايا ده.. يعني قصرنا في حق مهنتنا ونسينا دورنا.. ومش هنشر غسيلنا كصحفيين، ولا اللي بنتعرض له جوه مؤسساتنا مننا وفينا.. ولما دخلوا صحافة سوشيال دخلوها بنفس الفكر القديم فـ أخفقوا.. صانع المحتوى حضرتك قام بدورنا وسبقنا، وبدأها من الصفر، من غير إمكانيات ولا دياوله.. الحقيقة اللي لازم نواجهها: مش صانع المحتوى هو اللي سرق مكان الصحفي، لكن مؤسسات كتير هي اللي فرطت في صحفييها وضيعت فرصتها.. واللي مش قادر يعترف إن الزمن اتغير، هيفضل يحارب الناس اللي سبقته، بدل ما يسأل نفسه: ليه الجمهور سابني وراح لهم؟
