بوابة الوقائع لكل خبر حكاية
مقالات مشابهة
نهى السيد
كشف دفاع والدة الأبناء الأربعة ضحايا والدهم، تفاصيل الواقعة التي هزت الرأي العام، موضحا أن المتهم المعروف إعلاميا بـ سفاح القليوبية اعترف أمام جهات التحقيق أنه لم ينتوِ قتل زوجته وإنما خطط لقتل أبنائه الأربعة انتقاما من زوجته على إثر خلافات بينهما.
وأضاف أن المتهم بدأ بذبح الطفلة الصغرى، وانتهى بقتل الابن الأكبر، مشيرا إلى أنه اعترف أمام جهات التحقيقات أنه ارتكب جريمته وهو بكامل وعيه، لكنه وطوال سنوات ماضية تعاطى المخدرات.
تفاصيل قضية سفاح القليوبية المتهم بقتل أبنائه الأربعة
وأردف: قبل الجريمة جاب أولاده وقعد يكلمهم إنه هيشوف شغلانه أفضل وبفلوس أكتر، وكلمهم عن ظنونه وشكوكه إنهم يعرفوا حاجة عن أمهم ومشاكله معاه، واعترف إنه قتلهم وهما نايمين وخلص جريمته في 10 دقايق، وأغرب حاجة إنه اعترف، إنه بيحب مراته ولسه بيحبها، وإن روحه في أولاده وبيحبهم، وده كلام في منتهى الغرابة.
وطلب المحامي إبراهيم صالح دفاع والدة الأبناء الأربعة ضحايا والدهم سفاح القليوبية بالحق المدني مائتان ألف وواحد جنيه على سبيل التعويض المدني المؤقت أمام جهات التحقيق.
نص تحقيقات قضية سفاح القليوبية
واستمع رجال التحقيق إلى أقوال والد المتهم بقتل أبنائه الأربعة والتي جاءت كالآتي:
س: ما الحالة الاجتماعية وظروف نشأة كلا من المجني عليه تسنيم، نديم، تغريد، وجلال عبد العظيم سعيد؟
ج: تسنيم في ثانوي وعزباء ونديم في تانية أو تالتة إعدادي وعزباء وتغريد وشهرتها ريتاج عندها 9 سنين وفي ابتدائي وأخوهم جلال الله يرحمه كان عنده 18 أو 19 سنة تقريبًا ساب التعليم من قبل ما ياخد دبلوم الصنايع، كان شغال مع أبوه في سوق السمك في العبور، وكانوا كلهم عايشين مع ابوهم عبدالعظيم سعيد عبدالعظيم، في نفس البيت اللي حصل فيه الموضوع في حلابة، وأبوهم هو اللي كان بيصرف عليهم ومنفصل عن أمهم من سنة تقريبًا، عشان بيشك في سلوكها وإنها بتخونه، وأمهم عايشه مع أهلها في المطرية والدنيا معاهم كانت مزنقة في الفلوس.
س: ما طبيعة علاقة المجني عليهم سالفي الذكر بوالدهم المتهم عبد العظيم سعيد عبد العظيم؟
ج: علاقتهم بأبوهم كانت عادية ومشوفتش مشاكل بينهم وبينه غير مرة من حوالي 8 شهور كانوا الأربع عيال الله يرحمهم قاعدين عندي في بيت العيلة لقيت عبد العظيم كان شارب مخدرات ونازل ضرب في تسنيم وشهرتها ملك وانا وقفتله راح ضاربني بالبوكس أنا كمان، ومعرفتش منه ضربها ليه بس غير كده كان بيعاملهم عادي.
س: أو لم تقم بسؤال المجني عليها تسنيم عبدالعظيم سعيد عن سبب قيام والدها بالاعتداء عليها؟
ج: لا، لأني كنت عايز أعمل فيه محضر بس الأهالي هدوني ساعتها.
س: ما الذي حال دون ذلك؟
ج: لأني كنت عايز أعمل فيه محضر بس الأهالي هدوني ساعتها.
س: هل سبق وأن اعتدى المتهم عبدالعظيم سعيد عبدالعظيم على أي من أبنائه المجني عليهم من قبل؟
ج: هو كان ساعات بيضربهم أما بيضايقوه في أي حاجة أو لو مسمعوش كلامه.
س: ما طبيعية الحالة المادية والاجتماعية وظروف نشأة المتهم عبدالعظيم سعيد عبدالعظيم؟
ج: هو عنده 45 سنة وأنا ربيته في بيتي وانا اللي كنت بصرف عليه وهو صغير بس أنا راجل على قد حالي وكنت شغال في الجمعية الاستهلاكية وكنا عايشين عيشة على القد وهو معاه دبلوم صنايع وشغال شيال من وهو صغير واتجوز رشا من حوالي 25 سنة تقريبًا وخلف منها أحفادي حبايبي الله يرحمهم تسنيم ونديم وتغريد وجلال وكانوا عايشين في بيت عبدالعظيم اللي في حلابة اللي حصلت فيه المصيبة وكان بيشرب حشيش وايس وبانجو كتير جدا.
س: هل سبق ضبط المتهم في قضايا جنائية من قبل؟
ج: اتقبض عليه قبل كده عشان كان قاعد مع واحد بيبيع بانجو وأخد براءة بعدها من حوالي 10 سنين ومش فاكر أي تفاصيل عن القضية.
س: وما طبيعة علاقة المتهم بزوجته؟
ج: هو اتجوزها من حوالي 25 سنة أما كان شغال في المطرية وخلف منها أحفادي الضحايا بس كانوا بيتخانقوا كتير بسبب إنه بيشك فيها كل شوية وكان طلقها قبل كده من كام سنة وردها بعدها.
س: هل ما زالت العلاقة الزوجية قائمة بين سالفي الذكر؟
ج: لا هو سابها وطردها من البيت وهي عايشة عند أهلها في المطرية من حوالي سنة أو أقل شوية.
س: ومتى كانت آخر مرة تقابلت فيها مع نجلك المتهم؟
ج: من حوالي 10 أيام في البيت عندي.
س: وكيف كانت الحالة التي أبصرت المتهم سالف الذكر عليها؟
ج: كان عادي متكلمتش معاه كان قاعد مع أمه شوية بس كان شكله طبيعي خالص.
س: وما الذي قد يدعو المتهم لارتكاب الواقعة؟
ج: أنا والله مش عارف هو عمل كده ليه يا رب ياخد حكم الإعدام على حرقة قلبي أنا والعيلة كلها.
س: وما قصد سالف الذكر من ارتكاب الواقعة؟
ج: قصده انه يقتلهم كلهم.
س: وكيف وقفت على ذلك القصد؟
ج: عشان مفيش غيره يعمل كده.
س: وما سندك في اتهام نجلك بإزهاق روح أبناؤه المجني عليهم؟
ج: عشان ابني التاني قال إن المتهم بعتله فيديو لعياله مقتولين وعشان هو اختفى من ساعة اللي حصل وعشان هو زرع شيطاني وبيشرب مخدرات ويعملها.
س: هل كانت هناك خلافات سابقة بينك وبين نجلك المتهم أو زوجته؟
ج: لا خالص.
س: هل من شاهد أبصر الواقعة أو أيا من تفصيلاتها؟
ج: معرفش.
س: هل من ثمة آلات مراقبة بمحيط محل الواقعة رصدت أيا من تفصيلاتها؟
ج: معرفش.
س: ما قولك فيما ثبت بمحضر جمع الاستدلالات المحرر بتاريخ 2024/7/30 بمعرفة نائب مأمور مركز شرطة قليوب والثابت به العثور على جثامين كلا من المجني عليهم مذبوحين بالمسكن محل الواقعة؟
ج: ايوه ده اللي حصل فعلًا.
س: ما قولك فيما ثبت بمحضر جمع الاستدلالات سالف البيان من اختلاف أسماء المجني عليهم عن الأسماء التي شهدت بها؟
ج: هي الكبيرة اسمها تسنيم وشهرتها ملك والوسطانية اسمها نديم وشهرتها ياسمين والصغيرة اسمها تغريد وشهرتها ريتاج.
س: هل لديك أقوال أخرى؟
ج: لا.
قررت جهات التحقيق، تجديد حبس سفاح القليوبية المتهم بقتل أبنائه الأربعة في القضية المعروفة إعلاميًا بـ سفاح القليوبية، 15 يوما على ذمة التحقيقات.
